O concelleiro de cultura de Taboada e organizador da Festa, Manuel Diéguez, exerceu de anfitrión do acto no que resaltou que a festa é moito máis ca unha celebración gastronómica, “un símbolo territorial e identitario, unha mostra tanto da cultura como da natureza que define as raíces de Taboada”. E tamén destacou que é a festa, o compromiso coas tradicións locais, unha pegada de identidade.
Colocou o acento en celebrar non só a riqueza do caldo e a inmensa abundancia das mellores materias primas do territorio, senón tamén en todo o Patrimonio Inmaterial vencellado á receita e ao ritual.
Participaron na presentación dende a Xunta e Galicia, Carmen José López, directora de emprego e comercio e dende a Vicepresidencia da Deputación Provincial, Iria Castro, Deputada de cultura, institucións que apoian a iniciativa; ademais do Alcalde de Taboada, Roi Rigueira.
A celebración pretende ser un recoñecemento e homenaxe ás mulleres de Taboada, ao seu valor de coidar, gardar e continuar a transmitir o legado non só do caldo, senon do patrimonio inmaterial e da identidade cultural.
A programación conta con actividades para todos os públicos destacando o pregón, o domingo ás 13.35 horas, a cargo da Olga Novo, Premio Nacional de Poesía no 2020 e a degustación gratuíta do Caldo de Ósos que ofrece despois do pregón o gremio de hostalaría.
O sábado abrirase a cita con música e a inauguración da exposición “As donas do Caldo de Ósos”, na que catro fotógrafas, retratan doce mulleres de Taboada, nas súas cociñas. Ás 20:00h comezará a Ruta osovinícola polos bares de Taboada. O documental “O Caldo de Ósos nas túas mans” proxectarase ao longo da fin de semana no Cuartel Vello.
O domingo o recinto feiral abrirá ás 11:00h e haberá distintas actuacións musicais. Ás 19:00h celebrarase na Praza de Riazón o obradoiro “Culleres foliadeiras” e tamén se contará cunha cata maridaxe a cargo de Suso Costela, o Caldo de Ósos con DO Ribeira Sacra. Ás 21:30 tamén na praza de Riazón haberá degustación gratuíta de produtos do porco. O fin de festa farase con música da Orquestra Saudade.
Caldo de Ósos Taboada presentación 2025 / Delegación Territorial
.
