O Equipo de Goberno e a veciñanza realizou, este pasado 8 de marzo, unha concentración diante da Casa do Concello da Pobra do Brollón para conmemorar o ‘Día Internacional da Muller’ e reivindicar a igualdade de xénero en todos os espazos da vida política e social.
A concelleira de Igualdade, Noelia Besteiro, deu lectura ao manifesto e a continuación procedeuse a repartir entre as e os asistentes uns imáns con deseños da cativada do colexio. As creacións foron realizadas no centro escolar como actividade creativa e de concienciación coa igualdade.
Tras a concentración, parte do Goberno Municipal trasladouse ao CEIP Plurilíngüe da Pobra do Brollón onde as nenas e nenos faláronlles das mulleres importantes nas súas vidas antes de comezar o obradoiro ‘Conectando en igualdade’ a cargo da educadora social Paula Santos.
Dende o Concello da Pobra do Brollón trasladan que, con accións coma estas, queren reafirmar o compromiso cos dereitos das mulleres e as nenas para que, en palabras de Noelia Besteiro, “sexan elas as protagonistas do seu presente, para que sexamos nós as protagonistas do noso presente. As protagonistas da nosa felicidade”.
O manifesto pode lerse na páxina web do concello.
