A pesar de non residir en Quiroga, a autora si visita habitualmente Os Anguieiros – aldea natal materna -, e realiza rutas polo municipio frecuentemente, aínda que recoñece non ter participado nunca na feira do viño, algo que ten pensado facer este ano.

Segundo Laura Maquieira, o cartel invita a ver o viño de Quiroga como un elemento que conecta a súa historia, a súa terra e a súa xente, regando con vida cada recuncho do concello e celebrando a unión da natureza e a cultura a través da Feira do Viño.

A composición xira arredor dunha botella de viño que verte o seu contido, simbolizando a súa riqueza. O viño flúe como un río a través dos monumentos máis representativos conectándoos de xeito lúdico e orgánico. O túnel romano de Montefurado; o mural de Erundina, a vendimadora sobre rodas; a igrexa de San Miguel de Montefurado; o muíño de aceite de Bendilló; a igrexa de Santa María da Ermida; a capela das Farrapas; a silueta das montañas do Courel e a igrexa de San Martiño de Quiroga represéntanse en siluetas negras. O viño, branco e tinto, serpeante a través da paisaxe,  remata en vasos e cuncas, está elaborado cun bordado a man sobre tea, feito de xeito intencionadamente libre para reflectir a autenticidade e a artesanía do viño local.

O cartel foi escaneado para manter a textura artesanal e trasladado a un formato impreso de alta calidade. É este será o cartel que a partir de agora anuncie todo o relacionado coa  XLIII Feira do Viño de Quiroga.

Este concurso está premiado con 450 €, un diploma acreditativo e botellas de viño das adegas participantes na feira desta edición.