Os cortes durarán 15 minutos e tentarán chamar a atención sobre as fochancas, gretas, falta de sinalización e pouca iluminación da estrada. Dende a Asociación de Empresarios de Chantada e CCA Ribeira Sacra aseguran apoiar firmemente a protesta, “xa que o estado da Nacional 540 afecta de xeito direto a todo o tecido empresarial e comercial da vila”.

En decembro de 2023 xa se fixera unha mobilización para exixir o arranxo da estrada nacional, ademáis de remitir unha carta ao ministro de Transportes, Óscar Puente, pedindo unha solución definitiva.

“O pésimo estado de conservación da Nacional 540 fai que sexa moi perigoso circular por varios tramos, e, malia a mobilización de 2023, neste tempo só se acometeron parches, sen dar unha solución real ao problema”, insisten e animan a todos os seus asociados e asociadas, así como a toda a veciñanza de Chantada, a sumarse a estas mobilizacións.