Renfe oferta 4.200 prazas extra para a conexión entre Galicia e Madrid con motivo da Semana Santa, datas nas que aumenta moito a demanda.

A compañía programou trens en dobre composición e a substitución de trens S730 por material S106 extra para os días de maior mobilidade. Grazas ás modificacións de material rodante e á circulación de trens ao dobre da súa capacidade, Renfe ofrece aos clientes máis de 4.200 prazas extra sobre os servizos habituais nas conexións con orixe/destino Santiago, Vigo, A Coruña ou Lugo.

Para a conexión con Vigo, serán máis de 1.000 prazas extra, repartidas os días 19 (no 4275 Madrid-Vigo) e día 20 (o 4354 Vigo- Madrid), que se prestarán con material S106, en lugar de material S730. Ademais, o día 21 circularán en dobre composición os Alvia 4275 Madrid-Vigo e 4354 Vigo-Madrid.

As conexións da Coruña e Lugo con Madrid suman máis de 2.000 prazas adicionais grazas aos reforzos que xa comezaron os días 11 e 12, coincidindo coa operación saída; e os programados para os días 20 e 21 para facilitar o regreso. Ademais, na conexión con Santiago, Renfe programou o 20 de abril dous trens especiais Avlo, con material S106, entre Santiago de Compostela e Madrid, un en cada sentido. Isto supón o aumento en máis de 1.100 prazas extraordinarias para facilitar a operación retorno.