O corte afectará ao tramo comprendido entre os puntos quilométricos 18,00 e 29,396 desta vía, que conecta Chantada cos Peares, pasando por Nogueira. As actuacións contan cun orzamento de 17.500€. Durante os traballos, habilitaranse desvíos alternativos sinalizados para garantir a circulación e permitirase o acceso a residentes nas zonas afectadas.

A Xunta de Goberno aprobou a adxudicación á empresa Ovisa Pavimentos y Obras SLU das obras de acondicionamento da estrada que conecta Monforte de Lemos e Sober –a LU-P-3201- ó inicio da vía, nun tramo que comprende algo máis da metade do trazado desta estrada, do punto quilométrico 0,814 ao 2,540. O prezo de adxudicación é de preto de 265.000€ e un prazo de duración de 2 meses.

Tamén saíu adiante a aprobación da licitación por máis dun millón de euros do contrato para a prestación do servizo de conservación e mantemento da rede viaria en 9 municipios da zona sur da provincia (Monforte de Lemos, Bóveda, A Pobra do Brollón, Sober, Pantón, O Saviñao, Taboada, Chantada e Carballedo). A duración será de dous anos que poderán prorrogarse por outro máis.

No paquete do Plan de mellora das estradas 2025, a Deputación actuará na Pobra do Brollón e Sober, mellorando a LU-P-5903 e xa están licitadas as obras para mellorar a LU-P-4702, que conecta na Ribeira Sacra Vilachá de Salvadur coa Estación da Pobra do Brollón; e a LU-P-0301, de Antas de Ulla ó límite provincial.