O encontro estivo guiado por Héctor Méndez, Garda Civil e psicólogo, formador do Plan Director, coa colaboración do Servizo de Educación e Apoio Familiar do Concello de Chantada que con financiación da UE, conta cun psicólogo e un educador social.
A concelleira de Educación, Belén Vázquez Caseiro, destacaría durante a presentación, “O obxectivo deste tipo de encontros é que os/as nenos/as poidan identificar estas situacións, se son acosados/as, acosadores/as ou cómplices. O ano pasado celebramos o día do acoso escolar cun acto similar, cremos que este tipo de propostas son fundamentais para poñer aos máis novos cos pés na terra sobre un tema que segundo os últimos datos afecta a 1 de cada 3 nenos e nenas”.
Na actualidade, os casos de acoso escolar danse principalmente entre cuarto e sexto de primaria. As orixes sempre son múltiples e están moi vencelladas á familia, “Os datos de convivencia familiar son cada vez peores debido ás reaccións de pais e nais. Cando chega a situación vemos que as familias das vítimas queren arranxar as cousas, as do acosador difícilmente mostran intención de solucionar a situación”, asegura Méndez.
Xornada prevención do acoso escolar / Concello de Chantada
Neste tipo de actividades formativas chámase a atención sobre a necesidade de fixarse en se algún neno/a o está pasando mal ante algo que lle fan ou naqueles compañeiros/as que quedan illados/as dos xogos e actividades.
Á hora de identificar os dous perfís, o de acosador/as adoita ser máis complicado porque moitas veces utilizan unha careta e ofrecen distintas caras, como explica Méndez, pola contra a vítima ten comportamentos máis fáciles de apreciar, “Comeza a durmir mal, baixa as notas, está más illado, máis triste, fala menos,…Hai que valorar que estes cambios de comportamento non sexan outras cousas, pero poderían deberse a unha situación de acoso escolar. Por exemplo, o principal motivo polo que un neno se autolesiona é o acoso escolar, aí hai claramente un sufrimento extremo”.
No acoso escolar hai sempre un trasfondo familiar con múltiples causas, “As familias desestruturadas teñen o perfil máis alto de vítimas, eses nenos e nenas que teñen unha situación complicada son máis vítimas de acoso escolar. Mentres que a figura do/a acosador/a adoita ser de familia estruturada, cunha falta de límites na educación que está recibindo”, asegura Héctor Méndez.
Xornada prevención do acoso escolar / Concello de Chantada
