A xornada contou coa intervención de gandeiras e gandeiros, investigadoras e persoal técnico de distintas administracións, que achegaron a súa experiencia e visión sobre prácticas vinculadas ao ecorrexime de pastoreo en extensivo en pastos húmidos.
Na súa intervención o vicepresidente da Deputación de Lugo, Efrén Castro, subliñou a importancia “da gandería extensiva e o incalculable valor desta actividade nos nosas zonas de interior e de montaña, tanto dende un punto de vista de xestión territorial, dinamización económica e social e fundamentalmente preventiva dos lumes forestais e de conservación da biodiversidade animal e vexetal”.
O vicepresidente da Deputación lembrou o soporte económico e de asesoramento que a área de Rural da Vicepresidencia da Deputación de Lugo ofrece a estas gandarías a través do programa de fomento do silvopastoreo “O que non arde” ou das convocatorias de apoio á recría de razas autóctonas. “Estes programas supoñen un complemento para moitas gandarías que están a realizar un traballo de xestión de territorio e de produción de alimentos en moitos casos non compensados polas axudas directas da PAC”. Nesa liña, o responsable provincial defendeu a necesidade de avanzar na inclusión das singularidades propias do sector agrario galego nos criterios da PAC.
As exposicións completáronse pola tarde coa visita á Casa da Fonte de Pantón, unha das 45 gandarías integradas no programa Da Escola á Granxa
