A limpeza da lagoa do Parque dos Condes é levada a cabo, ano a ano, dende que José Tomé Roca chegou ó goberno de Monforte, de modo que esta será a undécima limpeza. O primeiro dos pasos para a limpeza da Lagoa do Parque dos Condes, consiste no baleirado da auga, baleirado que se levará a cabo utilizando unha máquina motobomba para extracción de líquidos.

Posteriormente, procédese a extraer cunha máquina paleadora todo o lodo que se foi depositando no fondo da lagoa durante este inverno. Para desenvolver ditos traballos, emprégase unha bomba cuxo aluguer ascende a 300 euros, mentres que o custe dos traballos da empresa contratada ascenden a aproximadamente 5.000 euros.

 “A lagoa é un dos espazos máis emblemáticos da nosa cidade. Co Parque dos Condes ao seu redor trátase dunha das zonas que atrae un maior número de visitantes e tamén é un dos lugares máis frecuentados polos veciños e veciñas para dar paseos”, destaca o Alcalde.

O mandatario municipal engade que “por iso, consideramos que a limpeza e o mantemento da lagoa é unha tarefa imprescindible para poder dar unha boa imaxe, para que os monfortinos e monfortinas desfruten da mesma, e que esta zona sexa unha das nosas mellores cartas de presentación”.