O encargado de desvelar o programa desta edición foi Iván Piñeiro, vicepresidente de Meigas e Trasgos, a asociación que organiza un ano máis esta tradicional cita que aspira a ser declarada de Interese Turístico Galego. A entidade tramitou recentemente a solicitude e agradeceu o asesoramento e a colaboración no proceso do Goberno galego.

A Xunta de Galicia patrocina o concerto que ofrecerán Xabier Díaz e Adufeiras de Salitre o venres, 29 de agosto. A programación inclúe tamén nesa primeira xornada as actuacións de Mondra e DJ Russ. Na organización dos concertos desta xornada colabora a Vicepresidencia da Depurtación de Lugo.

O vicepresidente da Deputacion destacou a tradición da Noite Meiga como “forza do noso imaxinario mítico” e valorou “a continuidade que Meigas e Trasgos lle deu a esta celebración, mantendo ao mesmo tempo un papel referencial na vida cultural e social de Sarria a partir do baile e da música tradicional”.

O sábado a animación musical correrá a cargo da Banda de Música da Comarca de Sarria, dos grupos de danza de Meigas e Trasgos, e D´Crooners Band, ademais de celebrar, xa de madrugada, a Danza da Noite Meiga, o epicentro desta festa. O domingo está dedicado aos máis cativos, coa “Tardiña meiga”.