USO Galicia lembra que a comezos do 2021 xa censuraran que o consistorio monfortino non se adherira ao Convenio coa entón Vicepresidencia e Consellería de Presidencia, Administracións Públicas e Xustiza da Xunta de Galicia para a selección dos membros dos corpos de policía local, vixiantes municipais e auxiliares de policía local (DOG nº 222, de 22/11/2017).
Criticaban tamén que unha convocatoria coincidise coa convocatoria unitaria da propia Academia Galega de Seguridade Pública (AGASP), “Criticamos que esa mera casualidade supuxo que 280 aspirantes tivesen que optar entre unha ou outra convocatoria, pedimos cambiar a data, e á negativa, esta organización sindical solicitou a devolución das taxas, xa abonadas, aos opositores e opositoras que non se presentaron, petición que tampouco foi atendida”.
O sindicato USO leva anos cuestionando a convocatoria de prazas de Policía Local á marxe do proceso selectivo da Xunta de Galicia. De 126 concellos galegos con Corpo da Policía Local, 97 (incluídas as sete grandes cidades, coa recente incorporación de Ourense) encomendan á AGASP a selección de policías, o 73%.
