No total da provincia benefícianse 10 concellos aos que a Consellería de Política Social destina 571.400 para o desenvolvemento de programas de inclusión social. O obxectivo final é financiar medidas que teñen por obxecto impulsar a igualdade de oportunidades e a inclusión social dos colectivos máis desfavorecidos. Con estas axudas aos concellos preténdese que estes fagan investimentos en centros de inclusión e emerxencia social e impusen a inclusión social da poboación xitana, inmigrante e outras persoas en risco de exclusión.

Segundo o delegado territorial da Xunta, José Manuel Balseiro, os servizos sociais municipais son a miúdo os que brindan o primeiro nivel de atención ás persoas usuarias e as dirixen cara ao resto dos recursos dispoñibles; de aí que as Administracións deban colaborar para “propoñer oportunidades de integración social e laboral, especialmente ás persoas que presentan risco de exclusión”.

Entre as accións subvencionadas por esta liña de apoios da Consellería, figuran os servizos de apoio á inclusión, servizos de mediación para a poboación xitana e inmigrante, programa de erradicación do chabolismo, asesoramento en materia de estranxeiría e formación para o coñecemento dos valores da sociedade de acollida e linguas para a poboación inmigrante.