Os obradoiros “Tecendo memorias” buscan recuperar a memoria comunitaria e cultural do pobo fomentando a socialización a través da recuperación da cultura, da historia do lugar e das historias de vida das persoas que residen nas parroquias do concello de Quiroga. A actividade, que se desenvolverá de setembro a novembro, é froito dun convenio de colaboración entre o Concello de Quiroga e a Área de Cultura de Vicepresidencia da Deputación de Lugo

Os obradoiros teñen como obxectivo principal a recuperación da cultura do pobo e das historias de vida que reforzan a identidade, así como reactivar e estimular a memoria colectiva, comunitaria e popular, para contribuír á socialización e á activación veciñal.

Un espazo de encontro entre persoas do rural que ademais axuden a preservar a cultura popular local e do territorio, fomentando o intercambio de coñecementos, de costumes, vivencias, experiencias e saberes. Estes talleres serven para mellorar as habilidades cognitivas dos participantes a partir da lembranza dos seus costumes, das súas vivencias persoais, dos seus xogos, da súa toponimia e da súa sabedoría popular (ditos, refráns, cancións, música, etc).Os obradoiros realizaranse no Centro Social de Quiroga, Ermida e Campos de Vila desde setembro a novembro.

No Centro Social de Quiroga o horario será todos os luns desde ás seis da tarde e ata ás oito do serán. No Centro Social da Ermida o obradoiro terá lugar  os mércores de seis a oito da tarde ,a presentación e anotación de interesados/as farase o 3 de setembro ás 18:00 h no mesmo centro.

Finalmente no Centro Social de Campos de Vila, a actividade terá lugar os xoves no mesmo horario de 18:00 a 20:00 h. O 4 de setembro, ás seis da tarde terá lugar a presentación desta actividade e aquelas persoas que queiran anotarse poden realizar as inscricións este mesmo día para empezar coas clases o luns 11 de setembro