Co obxectivo de favorecer a integración das persoas con discapacidade, a Deputación de Lugo vén de concederlle 5.000 euros á entidade de carácter social Auxilia Monforte. O convenio de colaboración asinárono días atrás o presidente da institución provincial, José Tomé, e a presidenta da beneficiaria da asociación, Sofía Pardo Viloria.
Con esta achega, Auxilia Monforte poderá financiar un conxunto de actuacións deseñadas para promover a autonomía persoal dos veciños e veciñas da Ribeira Sacra que sofren algún tipo de discapacidade. Algunhas das actividades que poderán ser financiadas con estes cartos son: talleres de estimulación cognitiva, psicomotriz e dinámicas de grupo, intervencións individualizadas no fogar das persoas usuarias, e mantén contactos telefónicos con elas.
AUXILIA MONFORTE, MOI PENDENTE DA DISCAPACIDADE NO SUR DE LUGO
Segundo os datos do Censo de Persoas con Discapacidade de Galicia 2024, na provincia de Lugo hai máis de 35.000 persoas con diversidade funcional e neste caso, Auxilia Monforte atende ás persoas dos concellos de Monforte de Lemos, Bóveda, O Courel, O Incio, O Saviñao, Pantón, Quiroga, Ribas de Sil e Sober.
A Deputación de Lugo destina este ano 2025 un total de 41,2M€ –un terzo do seu orzamento– ás políticas sociais, que en palabras do Presidente “é algo que nos definen como Goberno e son un sinal de identidade desta Administración”.
