O pasado mes de maio dábase a coñecer unha iniciativa da empresa chantadina A Túa Xanela coa que esta buscaba dinamizar o rural ofrecendo de balde a actuación da Orquestra Cinema a un concello de Galicia que contara con menos de 40.000 habitantes e que fora o seleccionado tras un concurso previo.

Os concellos que se inscribiron para participar foron pasando polas redes da empresa promotora e no mes de agosto foron as votacións resultando finalmente gañador o Concelllo de Guntín. Detrás del quedaron, por este orde: Concello de Monterroso, Concello de Padrón, Brión, Taboada e Chantada.

Segundo explican dende a empresa impulsora desta iniciativa, ademais da noite coa orquestra preténdese que a cita sexa un xeito de dar a coñecer o concello gañador e a contorna do mesmo, polo que o formato para o 17 de outubro (día da actuación da Orquestra Cinema) será dun minifestival, con postos de cousas típicas da zona, unha visita guiada pola tarde para coñecer o máis xeitoso do lugar, etc.

A presentación oficial da iniciativa ‘Xanela Fest’ fíxose en Chantada o pasado 20 de maio.