O conselleiro de Educación, Ciencia, Universidades e FP, Román Rodríguez, visita os institutos IES A Pinguela e IES Daviña Rey, ambos en Monforte de Lemos, onde reiterou a aposta do Goberno galego por unha Formación profesional “moderna e innovadora” e “pegada aos intereses e demandas de cada territorio”.
Segundo o conselleiro as ensinanzas de FP seguen consolidándose en Galicia cunha cifra récord de 71.229 matriculados, o que supón un incremento do 3,5%. Unha dinámica que se reflicte tamén no conxunto da provincia de Lugo, con preto de 7.300 matrículas (un 4% máis) e, especialmente na área de Lemos-Chantada e Quiroga.
Neste último caso destacan a boa acollida das novas titulacións de Alta Especialización como o ciclo de grao medio Confección de moda e oferta parcial de calzado e complementos de moda do IES A Pinguela e o grao superior Sistemas de telecomunicacións e informáticos e oferta parcial de sistemas electrónicos e automatizados.
Aínda que non de nova implantación este curso, tamén salientar a demanda dos másteres de grao superior Ciberseguridade en contornos das tecnoloxías da operación e Sistemas de sinalización e telecomunicacións ferroviaria, ambos no IES Daviña Rey.
Román Rodríguez avanzou que o seu departamento ten previsto redactar o vindeiro ano un proxecto de ampliación do Instituto A Pinguela co fin de dotalo de instalacións axeitadas de cara ao futuro. Esta ampliación unirase a outras obras de envergadura acometidas en Monforte como foi a rehabilitación integral levada a cabo no IES Daviña Rey, cun investimento de 1,4M€.
