Aproveitando que o vindeiro día 10 de outubro é o ‘Día Mundial da Saúde Mental’ os organizadores das I Xornadas de Benestar Respira! quixeron que a xornada inaugural cadrara con esa data pois este tema é un dos referentes do evento que se estenderá ata o domingo 12.
Esta primeira xeira, na que haberá dous escenarios diferentes, dará comezo cunha sesión de ioga ás 16:00 h. no Centro Cívico do Malecón para continuar ás 19:00 h. coa inauguración dunha exposición colectiva no espazo artístico É Ribeira e rematar cun cine-fórum coa película documental El estigma del silencio. Nesta última actividade estará presente Adán Latonda, o produtor do filme.
O sábado 11 todas as actividades serán no Ateneo Casino. Ás 10:00 h. da mañá hai programado un obradoiro de Movemento e Natureza impartido pola experimentada bailarina e coreógrafa Estefanía Gómez. Esta actividade ten un prezo de 15 €. Despois, ás 12:30 h., terá lugar un coloquio sobre Nutrición Consciente facendo fincapé na relación entre alimentación e psicoloxía. Será impartido por Isabel Mourín, técnica en dietética e nutrición.
Xa pola tarde, ás 16:00 h., haberá un obradoiro de Risoterapia conducido por Agustín Pérez Meriño, e a continuación unha mesa redonda baixo o título de ‘Trastornos mentais, pódense superar?’ que contará coa presenza de expertos e coñecedores da materia.
Pechará a xornada ás 20 h. un coloquio sobre Fisioterapia e psicoloxía con Lucía López Martínez, psicóloga xeral sanitaria, e Daniel Rodríguez, Director da Clínica NÓS de Monforte.
Durante toda a xornada do sábado haberá un posto de venda con materiais relacionados co benestar integral.
O domingo 12 ás 12:00 h. o espazo escollido será a cafetería MON, lugar onde se desenvolverá unha charla sobre xestión emocional da man de Noelia Pastor, Psicóloga cognitiva e experta en coaching e xestión emocional.
I XORNADAS DE BENESTAR RESPIRA!
A organización destas xornadas corre a cargo do gabinete de psicoloxía e coaching euForte e Maro Producciones, contando estes coa colaboración doutros espazos e proxectos monfortinos como son: Ateneo Casino, MON comeysueña, Centro de Ioga Ganesha, É Ribeira e Cristina Web Developer.
En palabras dos organizadores, o obxectivo deste evento “é revindicar a necesidade de sacar á luz todas estas temáticas, para contribuir a unha mellor calidade de vida e en definitiva a un benestar integral das persoas”.
