O pasado 29 de outubro o director de Xanela, Iñaki Castiñeira, foi de visita ao I.E.S. Val do Asma de Chantada, centro que ofrece un módulo moi específico sobre telecomunicacións.

Concretamente estase impartindo desde este curso o “Ciclo Medio de Sistemas Microinformáticos e Redes”, formación na que colabora a devandita empresa de telecomunicacións galega con sede no Concello de Chantada. É o único centro galego que ten esta formación profesional e os rapaces e rapazas que a están estudando comezarán no mes de maio a traballar na empresa Xanela.

Castiñeira trasladoulle ao alumnado a relevancia que ten esta colaboración e o valor dun ciclo ofertado que ten “moitísimas opcións de saídas profesionais”. Ademais, subliñou que é moi importante “para empresas coma a nosa contar con traballadores formados”.