A instalación atópase no Edificio Multiusos e está equipada con 20 ordenadores de pantalla táctil para os aspirantes e 1 ordenador central para o examinador ou persoa encargada de xestionar a proba.
A posta en marcha desta aula informatizada é froito dun convenio de colaboración asinado o pasado 15 de outubro entre o Alcalde de Monforte, José Tomé Roca, e o Xefe Provincial de Tráfico de Lugo, Alberto Rodríguez Fernández, para dar resposta a unha demanda das autoescolas locais que, tal e como explicaba o rexedor, “levaban un tempo trasladando a necesidade dunha aula informatizada para desenvolver estas probas e evitar que os aspirantes acabaran tendo que desprazarse a Lugo, co prexuízo que iso conlevaría”.
Monforte convértese así no primeiro Concello da provincia de Lugo que dota un local con este equipamento. A nova aula do Edificio Multiusos, xa en marcha, dá cobertura a todas as autoescolas da zona sur da provincia de Lugo. A previsión é realizar un mínimo de 2 xornadas de exames ao mes e, entre outras vantaxes, os aspirantes obteñen os resultados en tan só dúas horas.
O Concello de Monforte investiu nesta dotación un total de 22.000€ que inclúen a adquisición e montaxe de equipos informáticos e todo o mobiliario necesario para a realización dos exames. En detalle, 15.000 euros corresponden ao gasto en ordenadores, 5.500 a mobiliario e 1.500 euros a montaxe.
