Este pasado sábado remataba o ciclo de actividades do ‘Outono xeolóxico’, unha iniciativa do Xeoparque Montañas do Courel para divulgar o patrimonio deste territorio e contribuír tamén á desestacionalización das visitas turísticas. A derradeira actividade “Xeorruta do Ferro 2: pontes de ferro e pazos de viño en Ribas de Sil” completou as prazas e resultou un éxito segundo traslada a xerencia do propio xeoparque.
Os participantes puideron gozar das vistas dende os Xeomiradoiros das Fontes e o de Pómez; visitaron as instalacións da adega Pazo de la Cuesta, onde puideron gozar dunha cata dos seus viños, e fixeron un paseo urbano pola contorna de San Clodio para falar, entre outras cousas, da ponte de ferro e a chegada do ferrocarril á vila. Acompañando aos asistentes, como guías e informantes, estiveron o técnico do Xeoparque, Roi, e o mestre e escritor local, Manuel Cao.
BENVIDA DE AUTORIDADES
A Deputada de Réxime Interior, Promoción do Territorio e Turismo, Pilar García Porto, e o Alcalde de Ribas de Sil e presidente do Xeoparque Montañas do Courel, Roberto Castro, deron a benvida ás persoas que participaron na actividade. A deputada lembrou que a institución provincial colabora co Xeoparque cunha achega económica de 25.000€ “para realizar diferentes accións de promoción e difusión coma esta”. Nesta liña, agradeceu o traballo que levan a cabo para “divulgar a riqueza xeolóxica, cultural e paisaxística deste territorio. Un traballo do que a institución provincial forma parte, colaborando de maneira firme e continuada para que iniciativas así sigan medrando e atraendo cada vez máis visitantes”.
Finalmente, García Porto, recalcou que “o territorio do Xeoparque é un lugar único, recoñecido pola UNESCO, e tamén un exemplo de como a unión dos concellos, da comunidade científica e das administracións pode crear oportunidades, impulsar o desenvolvemento sostible e contribuír a fixar poboación no rural. Ese é o noso compromiso: seguir apoiando un modelo de turismo responsable, de calidade, que respecte o territorio e que xere valor aquí, onde máis se necesita”.
