A Pobra do Brollón espera vivir este sábado 6 de decembro outra das súas grandes xornadas de Cantos de Taberna. Este ano alcánzase a XIII edición e participarán dez agrupacións tradicionais procedentes tanto da Pobra do Brollón como doutros municipios da contorna.
Todos os grupos pasarán ao longo do serán por cinco bares do núcleo urbano: Avenida, Bar Pirata, Primeiro de Maio e Vella Taberna na Pobra do Brollón; ao que se suma A Salanova, na aldea de Salcedo. O circuíto rematará arredor das dez da noite, aínda que, como noutros anos, haberá festa rachada e foliada ata entrada a madrugada.
As agrupacións locais participantes son Cantareiras de Fornelas, Os Corenta e Chinco, Os Somontanos e a Escola de Música Samoeiro. De fóra do concello participan Os Bochetas do Sil (Sober), Os Ministreles (Monforte), Os Parrandas (O Barco de Valdeorras), Os Tarabelos (O Saviñao), Son do Mao (Bóveda) e Triskeles (Monforte).
ÚLTIMOS DÍAS DO CONCURSO DE TAPAS
Dende o Concello da Pobra do Brollón lembran que o Concurso de Tapas da Guimaralia remata este venres 5 de decembro.
Participan no concurso cinco locais: Avenida, A Vella Taberna, Primeiro de Maio, O Pirata e A Salanova, este último establecemento en Salcedo; e as tapas ofrécense ao prezo de 1,50€. Pódense probar en horario de 12:00 a 14:00 e de 19:00 a 22:00 horas.
Os pinchos foron catados previamente polos cociñeiros profesionais Diego Martínez e Martín Mantilla co obxectivo de garantir unha calidade mínima dos petiscos a concurso.
Como en edicións anteriores, a elección do primeiro, segundo e terceiro premio será por votación popular. Cada votante debe marcar a súa tapa favorita nunha tarxeta de voto debidamente selada por todos os bares participantes, entrando así nun sorteo dun circuíto termal para dúas persoas no Hotel Balneario Iberik Augas Santas de Ferreira de Pantón.
