O rural do Concello de Sober ten vida, e así o demostran iniciativas como a da parroquia de Bolmente organizando un Mercadiño de Nadal este 6 de decembro. Como en anos anteriores, o local social acollerá entre as 10:30 e as 20:30 h. diferentes postos que ofrecerán produtos alimentarios, como mel e galletas; algúns de cosmética; libros; e outros relacionados co téxtil nos que se ofrecerán aos visitantes produtos elaborados con la, crochet ou roupa de segunda man.
A programación dese ano convida a achegarse en familia e pasar a xornada completa. Deste xeito, pola mañá haberá un taller de decoración de Nadal para a cativada ás 11:30 h. e ás 12:30 h. unha sesión vermú con polbeira. E pola tarde, ás 16:30 h. está programada unha actuación de maxia a cargo do Mago Iago, e ás 18:00 h. visitará o local social o Apalpador.
Para pechar a xornada, a cantante Estefanía Fernández, participante no coñecido programa de Antena3 “La Voz Kids”, interpretará os mellores temas do seu repertorio ás 19:00 h. Podedes lembrar unha entrevista que lle fixemos en Xornal de Lemos o pasado 2024.
ACCIÓN SOLIDARIA
Ademais da programación anterior, a organización do evento fará un ‘Chocolate solidario’. Toda a recadación conseguida coa venda de chocolate quentiño irá destinada á ONG Hospitalero sin Fonteras.
