O mercado de Nadal da Ribeira Sacra, organizado por ACIMTA, Asociación de Comerciantes e Industriais do Concello de Taboada, chega á súa quinta edición e busca consolidarse xa como evento referencial nas datas de Nadal no territorio Ribeira Sacra.
Este evento, que se desenvolverá durante toda a xornada do 20 de decembro na Praza de Riazón de Taboada, caracterízase polo seu selecto mercado de artesanía e produto local contando ademais cunha programación artística e cultural de gran calidade para todos os públicos.
En canto ao mercado, haberá postos de alimentación con produtos como mel, viño, doces, queixos, aceites, chocolates e xeados e postos de artesanía: bixutería, coiro, bonecos, decoración, etc.
AMPLA PROGRAMACIÓN CULTURAL E DE LECER
En canto á proposta cultural e de lecer de ‘Petiscos de Nadal’ haberá moitas actividades para todas as idades. Dende contacontos, obradoiros e maxia para público familiar, pasando por concertos para os maiores. Neste senso, salientar unha sesión vemú espectacular a cargo do mítico grupo The Lákazans, e outro tradicional a cargo de Os Carecos, para poñer o peche á xornada.
The Lakazans é unha banda galega de blues con traxectoria na escena musical desde 2011, ano no que un grupo de amigos decidiu iniciar este proxecto e que desde entón non deixou de medrar. Son un referente no panorama musical galego e cada vez máis presentes no ámbito estatal.
A entidade organizadora repartirá 3.000 rifas entre a xente que realice as súas compras no comercio local, e ao final da xornada terá lugar o sorteo dunha espectacular Cesta de Nadal.
AXENDA / HORARIOS
12:00 h. Apertura do Mercado de Nadal na Casa da Cultura.
12:15 h. Contacontos ‘Contos e Lendas’ a cargo de Velaísca.
13:30 h. Concerto en sesión vermú a cargo de The Lákazans.
16:30 h. Obradoiro de adornos ilustrados con Estudio Gnomo.
17:45 h. Actuación de maxia con ‘Mago Deimi’.
18:30 h. Sorteo dunha fantástica Cesta de Nadal con produtos artesáns.
19:00 h. Concerto de Os Carecos.
