Os tres homes de nacionalidade colombiana supostamente explotados laboralmente e presuntas vítimas dun delito de trata de seres humanos nunha granxa de porcos en Sarria xa teñen os papeis que lles permiten residir en España e están “totalmente integrados”.
Así o confirmou o avogado de dous destes homes, Ángel Vellé, que asegura que refixeron a súa vida na cidade de Lugo. “Están aquí traballando, totalmente integrados”, abundou. “Un deles xa estivera aquí e continúa coa súa vida en Lugo”, puntualizou.
Vellé constata que agora “esperan a que acabe pronto este procedemento”, que leva un xulgado de Sarria desde que hai case un ano, despois de que en marzo de 2018 se formulase a denuncia ante a Brigada de Estranxeiría da Comisaría de Lugo.
Os tres xa contan con “permiso de residencia, están aquí perfectamente como calquera outro cidadán, facendo a súa vida e integrados na sociedade”, resumiu o avogado lucense.
Segundo o relato das presuntas vítimas, viviron en condicións “miserables” entre “ratas e desperdicios”, sen “auga quente e durmindo nun catre que era unha espuma de ferros na cociña, con xornadas laborais de once e doce horas cun só día de descanso”.
A presunta explotadora non se puxo en “contacto” en ningún momento coas tres vítimas. “Non pediu desculpas, nin se produciu ningún tipo de comunicación”, asegurou o letrado.
En canto ao proceso xudicial, Ángel Velle indicou que apenas hai “novidades”. Advirte que, “polo de pronto”, a empresaria podería ser procesada “por un presunto delito contra os dereitos dos traballadores e outro de trata de seres humanos”.
