O Apalpador visitará este mércores, 24 de Nadal, as rúas de Monforte para desexarlles unhas Felices Festas aos nenos e nenas da cidade. O mítico personaxe do Nadal galego, acompañado dun músico amigo seu, deixarase ver a partir das 11.30 horas, co seu abrigo cheo de remendos.
O Apalpador forma parte da tradición popular galega. Nado no Courel, a súa figura está ligada ás festas do Nadal. De oficio carboeiro, grandullón, bo, de mirada doce e longas barbas coloradas, vive dos froitos silvestres, da caza de xabaríns e recolle mel. Coas ramas dos bosques elabora os xoguetes que as madeiras esconden para agasallar aos nenos e nenas. Esta animación corre a cargo de Anxo Moure, no papel de Apalpador, e de Servando Barreiro.
Apalpador Monforte / XdL
O Concello de Monforte lembra que nestas datas organiza os Concertos de Nadal dos grupos locais para dinamizar as rúas durante estas festas, animando tamén as compras. O alcalde, José Tomé, destaca que a aposta polos grupos monfortinos “é firme, e pon en valor a creación e propostas musicais en diferentes estilos das bandas locais”.
A colaboración do Concello de Monforte cos grupos locais é constante, sendo protagonistas do Verán Cultural a través dun ciclo de concertos en diferentes espazos da cidade durante os meses de agosto e setembro.
