Máis de 60 persoas participaron na presentación e cata “O sabor dunha paisaxe”, na que intreviron opresidente da D.O. Ribeira Sacra, José Manuel Rodríguez, Ruth Fernández Vidal, técnica do C.R.D.O.R.S. e a prestixiosa enóloga Isabel Mijares, licenciada en Ciencias Químicas en Madrid e en Enología en Francia cun Master en Enología pola Universidade de Burdeos e diplomada en Análise Sensorial de Viños e Alimentos, que se encargou de dirixir e comentar a cata.
Participaron sumilleres, enólogos, restauradores, distribuidores, xornalistas especializados en gastronomía e viños e responsables de compras; que puideron degustar a través dunha selección de 7 viños, todo o que é capaz de ofrecer esta D.O.
Xornalistas xaponeses ou o propio presidente dos Grandes Viños de Burdeos que asistiron á cata, mostráronse sorprendidos ao descubrir as posibilidades que ten unha variedade como a Mencía, asociada tradicionalmente a viños novos, pero que xa consideran unha variedade que ten moito que dicir na súa elaboración en barrica.
Despois de participar tamén en Fitur, onde se defendeu a candidatura de Ribeira Sacra a Patrimonio Mundial da Humanidade, a seguinte cita será Xantar en Ourense do 6 ao 10 de febreiro.
