A ANPA do CEIP Plurilingüe Virxe do Carme de Sober protesta para manifestar a súa “indignación e total rexeitamento á negativa da Consellería de Educación a dotar ao centro do profesorado necesario para desdobrar o agrupamento do Primeiro ciclo de Educación Primaria, que supera nun 10% as ratios establecidas legalmente”.
As familias esixen que se dote ao centro co profesorado necesario para emedar o que consideran “unha gravísima situación de discriminación, desamparo e desatención educativa que están a sufrir os nosos fillos e fillas e así poder recibir a atención educativa que merecen e á que teñen dereito”.
Moción de Agroma Sober
O curso 2025-2026 comezou para o CEIP Virxe do Carme de Sober cun agrupamento de 1º e 2º de Primaria, con 15 alumnos e alumnas, que excedía a rateo acordada como referencia (14 alumnos/as) e que, polo tanto, debería ser desdobrado. Esto non se produciu e o Primeiro Ciclo de Primaria mantívose agrupado, pois a Consellería de Educación considerou que “segundo a normativa vixente, pódese autorizar un incremento de até o 10 % da ratio por aula para atender incorporacións tardías en períodos de escolarización extraordinaria”.
Xa en decembro de 2025, incorporouse alumnado a este ciclo, facendo que a aula superase ese límite do 10% considerado pola Consellería.
Á volta das vacacións do Nadal, a Consellería continúa sen incorporar o profesorado adicional necesario, co cal 1º e 2º seguen agrupados, pese a exceder as rateos establecidas e a contar con alumnado con diversas necesidades educativas.
Ante esta situación, que provocou a mobilización da CIG-Ensino e da ANPA do CEIP Virxe do Carme, a Consellería sinalou que non vía necesario o desdobre dado que o centro está a funcionar “ben”.
“Agrupar alumnado de niveis diferentes cando hai unha excesiva rateo na aula provoca o sobreesforzo do profesorado e a perda de atención educativa axeitada ás necesidades e distintas condicións de aprendizaxe do alumnado”, insisten desde Agroma Sober. Con todo,a formación política espera que o pleno acorde respaldar as reivindicacións da ANPA do CEIP Plurilingüe Virxe do Carme e trasladar á Consellería de Educación a esixencia de dotar ao centro co profesorado adicional necesario para efectuar o desdobre de 1º e 2º de Primaria de xeito inmediato.
