Durante a visita, a subdelegada explicou que esta intervención forma parte do conxunto de actuacións extraordinarias que o Goberno de España está a desenvolver na provincia para reparar os danos provocados polos temporais deste inverno, cun investimento total de 11,9 millóns de euros destinado á rehabilitación de firmes nas estradas estatais da provincia.

A subdelegada destacou que o Ministerio de Transportes puxo en marcha un plan extraordinario de conservación para reparar os deterioros acumulados nas vías estatais tras o paso sucesivo de borrascas, “permitindo actuar de maneira inmediata nos puntos que máis o precisan”.

A actuación que se desenvolve na N-540, ao seu paso polo concello de Chantada, consiste na rehabilitación do firme mediante fresado e reposición da capa de rodadura, ademais doutras actuacións complementarias de sinalización e seguridade viaria. O obxectivo destes traballos é recuperar as condicións óptimas de circulación nunha vía moi utilizada, mellorando o confort e a seguridade das persoas usuarias.

A subdelegada lembrou que a N-540 ten tamén en execución un contrato de rehabilitación integral, que se reanudará nas próximas semanas.

N-540 visita Subdelegada do Goberno / Subdelegación do Goberno