O Pleno do Consorcio Provincial para a Prestación do Servizo contra incendios e Salvamento de Lugo, integrado pola Xunta de Galicia e a Deputación, aprobou este martes, 12 de febreiro, por unanimidade, a xestión directa dos parques comarcais dependentes do organismo: Barreiros, Viveiro, Vilalba, Chantada, Sarria e Monforte de Lemos.
O modelo de xestión proposto polo Presidente da Deputación, Darío Campos, supón, segundo o organismo provincial, un aforro de 260.000 euros ao ano, a subrogación dos 117 profesionais que ofrecen este servizo e a mellora das súas condicións laborais.
Por exemplo, pasarán a ser considerados como profesionais de actividades de risco. Son 75 bombeiros, 36 cabos e 6 xefes de parque, que pasarán a ser persoal laboral dos parques que forman parte do Consorcio Provincial de Bombeiros: Viveiro, Vilalba, Barreiros, Monforte de Lemos, Sarria e Chantada. Desde a Deputación Provincial aseguran, que a esta medida se engade a equiparación salarial, conseguida no mes de xuño.