Un grupo de alumnos e profesores do IES Daviña Rey viaxou a pasada fin de semana a Madrid. Nesta saída cultural os rapaces e rapazas, invitados polo deputado monfortino Francisco José Conde López, puideron visitar o Congreso dos Deputados. Na visita, os congresistas Francisco Conde e Jaime de Olano acompañaron ao grupo por distintas estancias do edificio para coñecer o funcionamento das institucións e adentrarse na historia democrática de España.
A viaxe serviulles tamén para coñecer lugares emblemáticos da capital coma: a Porta do Sol, a Praza de Cibeles, a Praza Maior, a Porta de Alcalá, o Palacio Real e o Museo Nacional de Ciencias Naturais. Como detalle final, alumnado e mestres asisitiron ao partido de fútbol disputado entre o Real Madrid e o Athletic de Bilbao no Santiago Bernabeu.
“Esta experiencia permitiulle ao alumnado ampliar coñecementos sobre a historia, a política e a cultura do noso país, ademais de fomentar a convivencia, a autonomía e o interese por descubrir novos espazos e institucións. Unha viaxe enriquecedora que, sen dúbida, quedará na memoria dos participantes tanto polo aprendido como polos momentos compartidos”, comentan dende a Dirección do centro de ensino monfortino.
