O IES Francisco Daviña Rey celebrou o pasado venres unha cerimonia de graduación en dúas sesións diferentes no salón de actos do instituto en recoñecemento ao valor, ao esforzo, á dedicación e ao crecemento persoal e académico do alumnado ao longo destes anos ata chegar a 4º da ESO e 2º de BAC. O salón estivo cheo de xente que compañou aos mozos e mozas nun dos momentos máis significativos da súa traxectoria académica.
Durante o acto interviñeron a directora do centro, as titoras dos grupos e varios representantes do alumnado, que compartiron lembranzas, agradecementos e reflexións sobre a etapa concluída. As súas palabras puxeron de manifesto os lazos creados durante estes anos e a importancia da comunidade educativa no desenvolvemento dos estudantes.
ENTREGA DE BANDAS E DIPLOMAS
Un dos momentos máis agardados foi a entrega das bandas e dos diplomas aos graduados e graduadas, símbolo do remate dunha etapa e do inicio doutra na que se presentarán novos desafíos académicos e persoais. A celebración contou tamén cunha actuación musical de carácter tradicional a cargo de membros da comunidade educativa e rematou o cun momento final de convivencia arredor duns petiscos na cafetaría do propio centro que permitiu que alumnado, familias e profesorado compartisen impresións e celebrasen xuntos este importante fito.
Desde o IES Francisco Daviña Rey felicitan a todo o alumnado graduado “polo traballo realizado e deséxanlle moita sorte nos camiños que agora emprenden”. O centro manifesta, ademais, o seu “agradecemento ás familias e ao profesorado polo acompañamento e apoio prestado”.
