O IV Encontro de Palilleiras de Monforte de Lemos, Capital da Ribeira Sacra conta con reunir arredor de 350 persoas integradas nunha trintena de asociacións de palilleiras, cifra que pode aumentar dado que o prazo para inscribirse remata o vindeiro día 1 de setembro. Desenvolverase na Explanada da Compañía en horario de 10:30 a 19:00 h tendo como propósito xuntar persoas apaixoadas na arte do encaixe de palillos e poñer en valor esta tradición.

Ademais, a xornada contará con 10 postos de venda especializados en materiais para palillar e encaixes procedentes de diferentes localidades galegas e tamén de Madrid, que permitirán ás participantes e ao público interesado coñecer e adquirir diferentes produtos relacionados con esta actividade.

Así mesmo, e como parte do recoñecemento ao labor desenvolvido polas persoas que manteñen viva esta tradición, o Concello de Monforte fará entrega dun agasallo institucional ás representantes de cada unha das asociacións participantes.

“Desde o Concello de Monforte queremos seguir apoiando e poñendo en valor o traballo das palilleiras, que con paciencia e dedicación manteñen viva esta tradición artesanal. Ademais, este encontro permite que Monforte sexa un punto de encontro para centos de persoas que comparten a súa paixón polos encaixes e polos palillos”, sinala o Alcalde de Monforte, José Tomé Roca.

PROGRAMA

10:30 h.- Recepción das palilleiras.

11:00-14:00 h.- Palillada.

12:00 h.- Inauguración da xuntanza de palilleiras.

14:00 h.- Xantar.

16:00 h.- Palillada.

17:00 h.- Sorteo de agasallos 19:00 h.- Despedida.