Desde o concello de Folgoso do Courel aseguran que poden dar este paso despois de recuperar a parcela cedida á Deputación de Lugo, “ao rematar o prazo do convenio asinado en 2018 sen que a residencia comprometida chegase a construírse. Tras anos de espera, o Concello volve poñer os terreos ao servizo dun proxecto que considera necesario para a veciñanza”.

O Concello de Folgoso do Courel comunicou formalmente á Consellería de Política Social e Igualdade a súa vontade de acoller unha residencia para persoas maiores no municipio, no marco do novo proxecto de centros residenciais impulsado pola Xunta de Galicia. No escrito remitido á Administración autonómica, o Concello expresa a súa disposición a facilitar unha parcela axeitada e comprométese a garantir a súa efectiva posta á disposición da Xunta dentro do prazo establecido.

A alcaldesa, Dolores Castro, sinala que o Concello seguirá traballando para que Folgoso do Courel poida contar cun recurso residencial próximo para as persoas maiores. “Coa manifestación formal da súa vontade e a dispoñibilidade dos terreos, o Concello dá un novo paso para facer posible esta infraestrutura no municipio”, conclúe a rexedora.