O recinto feiral que acolle os postos das adegas, 24 presentes nesta edición, estaba ateigado de xente contra as 13:00 h. cando facían acto de presenza na carpa que hai diante da Casa do Concello as diferentes autoridades, empezando polo Alcalde Luís Guitián, e continuando coa representación do concello invitado, O saviñao, o deputado de Turismo da Deputación, Eduardo Vidal, e o Conselleiro de Economía, Emprego e Industria, Francisco Conde.
O acto protocolario foi guiado pola xornalista de Onda Cero Monforte, Manola Porto, quen, despois dos diferentes discursos das autoridades nos que se gabou o viño de Amandi e os potenciais vitivinícola e turístico dunha Ribeira Sacra que quere ser Patrimonio da Humanidade, deu paso a María do Ceo, a pregoeira desta edición.
O pregón estivo trufado de referencias ao viño ripadas da sabedoría popular galega e portuguesa e tamén de frases de celebridades de todos os tempos e rematou cunha canción composta por ela con letra de Armando González adicada aos viños da ‘Riboira Sacrata’ como ela mesmo dixo. A canción que interpretou, acompañada pola Banda de Música de Sober, foi a seguinte:
RIBEIRA SACRA
Pendurada ó Sil, calma e valente, engaiolas o sol coas cepeiras, sorbes da terra dozuras meigas: matriz miuda, meloso abrente.
Caste que agromas do mesmo cerne terra fecunda: Lugo e Ourense,
¡leda os lindeiros cachos que ó leste tintan e arrolan uvas no berce!
Ribeira Sacra padal de mestres, catedral de goios e videiras, acios gabados da cor campeira, gallardos caldos de bagos febles.
Ribeira Sacra viño fulxente, revistes de veludo e xaneira o grolo lento de lumieira.
¡Engrea a quen te cata mainamente!
Dende a rodriga polas pendentes, deica a desfolla nas túas ladeiras, enches bacelos, colmas ringleiras, dos vindeiros caldos excelentes.
Ribeira Sacra flor que recendes, cor de picota, tella e cereixa, gusto de amora, arando e grosella, prez de madeira, beizón silente.
Ribeira Sacra viño fulxente, revistes de veludo e xaneira o grolo lento de lumieira.
¡Engrea a quen te cata mainamente!
Unha das pegas que ten este momento é que o gran barullo ambiental fai difícil, por non dicir imposible, que a xente presente no recinto feiral poida escoitar os discursos e o pregón.
