Nun comunicado emitido por SAF Chantada aseguran que nas sentenzas establécese a violación de dereitos fundamentais como o de igualdade ou o da integridade física, ademais de motivar o despedimento exclusivamente nunha falta de rendemento estando de baixa, cando cunha baixa de longa duración, esta queda establecida como o dunha discapacidade, motivo polo que converte este despido en nulo.
“Os colectivos con discapacidade ou os que son vítimas de violencia de xénero son colectivos de especial protección como así o establece a lexislación e as bases deste convenio,” sinalan, “e o Concello, estando ó tanto de todas estas irregularidades, sumouse ás pretensións de Samain, converténdose en cómplice da violación de dereitos fundamentais, cos diñeiros de todos os contribuíntes.”
Cren desde a SAF que estas e outras iregularidades cometidas por Samain son máis que suficientes para rescindirlle o contrato. “Esta empresa viola dereitos fundamentais das traballadoras, e presta o servizo nunhas condicións que non se ciñen ó convenio anterior. Esta forma de prestar o servizo padécena tamén a maior parte das usuarias, que ven como cada día son atendidas por unha traballadora diferente,” engaden.
SAF Chantada lembra que a empresa enfróntase a outras demandas por impago de antigüidade, pagas extras, quilometraxe e outros conceptos salariais. Nesta situación consideran que Samain “é unha empresa que sistemáticamente incumpre a lei tendo ó seu lado ao goberno municipal.”
Piden a rescisión inmediata do contrato con Samain e a volta a un servizo público de calidade, xa que na actual situación de incumprimetos e irregularidades o costo do servizo aumentou.
A maior parte destas traballadoras teñen danos severos e músculo-esqueléticos, “mentres o goberno municipal non fai o seu traballo vixiando a saúde das traballadoras e o cumprimento das condicións laborais, como así o esixe a lei e as cláusulas da concesión.”
