As investigacións iniciáronse o 2 de marzo tras presentar denuncia un veciño de Sober, quen ao entrar na aplicación do banco puido ver que lle fixeron un cargo de 89.000 euros mediante un cheque bancario. Seguidamente contacta co banco e infórmanlle de que bloquearon esa transferencia ao non dispor de fondos.

Esta persoa, desde hai uns anos gardaba nun armario da súa habitación un talonario de cheques en branco, e días atrás contratara os servizos dunha empresa para facer limpeza xeral na súa vivenda, polo que sospeitou que nese momento desaparecese o talón.

Segundo avanza a investigación, púidose pescudar que un dos empregados da empresa de limpeza que estivera nese domicilio, días despois personouse nunha entidade bancaria de Monforte para cobrar o cheque que subtraera, tras encher os datos. Ao tentar cobrar unha cantidade tan elevada, bloqueouse a operación, e fronte a conseguir o seu obxectivo, contraeu unha débeda de 4.000 euros co banco en concepto de comisión polos trámites da operación solicitada.