Os bombeiros evacuaron a última hora deste mércores en padiola a unha muller que se rompeu o nocello mentres traballaba nunha viña en Chantada. Foi cara ás 22.30 horas cando un familiar da ferida avisou ao 112 da lesión da muller, que se atopaba traballando nunha viña situada no lugar de Souto, en Nogueira de Miño.

Tratábase dunha zona de difícil acceso para que a muller saíse polos seus propios medios, así como para que accedese o persoal sanitario. Así as cousas, os Bombeiros de Chantada desprazáronse ata o punto e evacuaron á muller en padiola por un camiño de terra e pedras ata a ambulancia. Ademais, no operativo participaron efectivos de Urxencias Sanitarias de Galicia-061 e axentes da Policía Local e da Garda Civil.