A Unidade de Drogodepencia de Monforte, que actualmente está situada na Rúa Otero Pedrayo da localidade vai mudar ó barrio da Estación a comezos do vindeiro ano.

O Concello de Monforte ten alugado o edificio de ADIF dende o ano 2011 e logo de atender ás demandas do centro, a decisión tomada polo goberno local foi a de transladalo ó antigo Cuarto dos Axentes de Renfe. José Tomé Roca declarou que, “trátase dunhas instalacións que ata agora non tiñan uso polo que dende o Equipo de Goberno decidimos darlle utilidade ós locais polos que o Concello paga un alugueiro”.

A planta baixa do edificio consta de 306 metros cadrados, dos cales 265.70 son útiles. A amplitude do local facilita que o espazo conste de 14 salas. En concreto, as novas instalacións contarán cunha sala de espera, dous baños, unha sala de terapias, un laboratorio, un taller, un almacén e sete despachos.

As obras, financiadas integramente pola Deputación de Lugo cun presuposto de 90.000 euros, estímase que estarán rematadas a comezos do 2019.