As instalacións do Club Fluvial de Monforte permanecerán pechadas temporalmente por precaución despois de que se detectase un positivo en COVID-19 nun dos traballadores.

O Club xa informou o pasado luns de que as súas instalacións permanecerían pechadas 48 horas “por precaución” despois de que un dos seus traballadores tivese coñecemento de que estivera en contacto cun caso positivo de coronavirus. Segundo fontes próximas, o contacto produciuse fóra da localidade, durante uns días de vacacións do traballador.

De feito, as mesmas fontes apuntan a que o afectado só estivo ao redor dunha hora nas instalacións antes de que coñecese a súa posible relación cun positivo, momento no que se illou.

A última hora do martes, a PCR confirmou que o empregado dera positivo en COVID-19, polo que o Sergas activou o protocolo de rastrexo de contactos. Os compañeiros que coincidiron na súa quenda foron sometidos a PCR e, á espera dos resultados, o Club permanecerá temporalmente pechado.