José Manuel Arias, alcalde de Bóveda, trasladoulle ao cineasta e produtor local Alberto Díaz o seu apoio para emprender proxectos audiovisuais que ten en marcha e acordaron tamén que se proxecte na localidade a curta ‘A Rabia’, obra gravada en diferentes escenarios da zona sur e que este ano foi finalista dos Premios Mestre Mateo.
Na actualidade o cineasta busca apoio do ICAA para a coprodución dunha curtametraxe de animación que está a desenvolver coa produtora de Valencia Admirable Films e que levará por título ‘Ruído’.
O segundo dos proxecto para os que pretende a financiación do Instituto de la Cinematografía y de las Artes Audiovisuales de España é unha curta social con moito efecto visual que tratará sobre o autismo e que levará por título ‘Normal’. Neste caso, a peza será coproducida xunto coa empresa madrileña Not Alone.
Alberto Díaz explica que a postprodución de ambas curtametraxes se desenvolverá en Bóveda, no estudo cinematográfico ‘Triskel’, proxecto apoiado polo Grupo de Desenvolvemento Rural Ribeira Sacra-Courel que ten previsto inaugurar nas vindeiras semanas, o primeiro destas características que se instala no Concello de Bóveda.
