A XXI edición da Feira Outrora, en Rubián, contou este ano coa presenza da Axencia Galega da Calidade Alimentaria promocionando diferentes produtos agroalimentarios de calidade con catas e degustacións para os asistentes.
Dentro do programa de actividades “Experiencias de Calidade”, promovido pola Consellería do Medio Rural, os visitantes da Feira Outrora gozaron de catas-degustacións dos queixos galegos con denominación de orixe protexida gañadores dos ouros nas Catas do Queixos de Galicia 2024. Salomé Beiroa, catadora de queixos e membro do panel de catas, foi a presentadora desta actividade. Ademais, tamén houbo catas de produtos de Artesanía Alimentaria, coa participación de Chelo López, responsable de Gandaría Quintián; e do chef Marcos Arufe, do Espazo Gastronómico Remollo.
Ademais, ao longo da xornada celebráronse actividades coa carne de Ternera Gallega como protagonista, nas que se contou coa participación do director de promoción do Consello Regulador da Indicación Xeográfica Protexida e co chef Marcos Arufe.
Pola tarde pechouse a xornada cunha merenda elaborada con produtos de Artesanía Alimentaria na que estiveron presentes Tamara Castro, responsable de Sacra Pan S.L., que elaboran as tradicionais galletas de Xián; e Lourdes Pombo, responsable de Torta de Sarria.
