Ás 12:30 h. da mañá procedeuse á inauguración oficial do Parque do Barrio do Hospital, acto no que estiveron presentes o alcalde José Tomé e outros concelleiros e concelleiras da corporación. Xunto a eles estaban representantes da empresa que fixo as obras e o presidente da Asociación de Veciños do Barrio do Hospital, Miguel Ángel Pino.
O rexedor monfortino destacou que “hoxe é un día moi bonito porque cumpro o meu compromiso coa Asociación de Veciños do Barrio do Hospital e cos monfortinos e monfortinas, de construír neste barrio un novo parque público, nun barrio relativamente novo onde a maioría dos habitantes son xente nova e con nenos pequenos. Dende hoxe, tanto os veciños do barrio coma todos os monfortinos e monfortinas poderán disfrutar das súas instalacións”.
Este novo parque público da cidade ubícase na parcela que linda coa finca do Hospital Comarcal, coa rúa Corredoira, coa rúa Codesás e coa Ronda María Emilia Casas Baamonde, nunha extensión de algo máis de 8.500 metros cadrados. A nova infraestrutura urbana da cidade conta con varias zonas de céspede dotadas de mobiliario urbano, cunha zona de xogos infantís, paseos peonís lonxitudinais e transversais, zona de elementos biosaudables de ximnasia para maiores, así como alumeado e saneamento propios.
Como complemento ao anterior incorpora tamén 64 prazas de aparcamento para automóbiles, motos, bicicletas e prazas para eivados, o que beneficiará tanto á xente que vai ao Hospital Comarcal como aos que viven no barrio e o resto de usuarios da cidade que o necesiten.
ATRANCOS NO CAMIÑO
Tomé Roca, en declaracións á prensa presente no acto, lembrou as dificultades que atopou o equipo de goberno ata este momento da inauguración. Dende as xestións administrativas e preitos xudiciais para conseguir os terreos ata a nova adxudicación do proxecto a unha nova empresa, feito que atrasou e encareceu o proxecto e custe inicialmente previsto.
A pregunta dun medio referida a este sobrecuste, o alcalde dixo non saber o importe exacto, recoñeceu ese incremento e xustificou o mesmo referindo que houbo que reconstruír parte da obra que iniciara a empresa anterior, como o muro que hai facendo ‘L’ na parte do Hospital e da Rúa Corredoira, así como melloras que incorporou o proxecto da nova empresa adxudicataria, Calfensa Proyectos S.L. O importe polo que se adxudicou en segunda instancia o proxecto construtivo tivo un importe de 590.347,87 euros.
O investimento final do Concello para a construción deste Parque alcanzou os 600.000 euros, dos cales 150.000 euros son aportados pola Deputación de Lugo, sendo o resto do orzamento total aportado polo Concello.
ASOCIACIÓN DE VECIÑOS DO BARRIO DO HOSPITAL
Representando á Asociación de Veciños do Barrio do Hospital estaba Miguel Ángel Pino, quen amosou satisfacción polo remate da obra indicando que “dará servizo ao Hospital e á veciñanza do barrio e ao resto de Monforte”, e trasladou palabras de agradecemento ao concello “por mellorar o barrio”.
O alcalde, referíndose á asociación lembrou que no seu día, cando estaban en contacto con eles para falar do proxecto “non pensaban chegar a velo e aí está”.
ANTECEDENTES
O 30 de setembro de 2019 o Alcalde de Monforte deu a coñecer un proxecto para a construción dun novo Parque público no Barrio do Hospital. Ese mesmo día, iniciouse o procedemento para alcanzar estes obxectivos de construción do novo parque, xa que o Pleno da Corporación municipal aprobou a declaración de interese social da parcela onde se ideou construír esta nova infraestrutura urbana.
En decembro de 2020, o Concello obtivo da Xunta de Galicia o permiso para expropiar os terreos necesarios para levar a cabo este proxecto do futuro Parque do Hospital. A partir de aquí puxo en marcha o proceso para a licitación das obras de construción do novo Parque.
Adxudicado o proxecto, a empresa que tiña que facer as obras paralizou as mesmas o pasado verán alegando diferenzas económicas co Concello de Monforte, alegacións que non foron atendidas. Neste punto, e alegando incumprimento na execución de ditas obras no prazo establecido, o Concello de Monforte procedeu á rescisión do contrato, decisión que foi ratificada polo Consello Consultivo de Galicia. Procedeuse, logo, a unha nova licitación e adxudicáronse as obras á empresa Calfensa Proyectos S.L. que foi a que rematou os traballos este mes de outubro.
