Púxose en funcionamento, un ano máis a actividade de paseos de lecer en barca polo tramo do cabe que transcorre pola cidade de Monforte. Trátase, como dixo o alcalde, “dunha actividade que conta con moita aceptación tanto entre os monfortinos e sobre todo, nas persoas que nos visitan durante estes meses de verán”.
A actividade, que estará operativa ata o 30 de setembro, está organizada polo Concello de Monforte de Lemos, coa colaboración da Deputación de Lugo e o Club de Piragüismo Quixós, entidade que xestiona e organiza o servizo.
“Os paseos en barca polo río Cabe son durante os meses de verán un referente na programación cultural da cidade e un grande foco de atracción para a poboación local e para moitas persoas que nos visitan nesta época”, comenta tamén José Tomé.
Como é tradición, o punto de inicio dos percorridos é o embarcadoiro do Parque dos Condes e cada paseo, dunha duración de media hora, custará 3,25 euros, como en anos anteriores.
Estas travesías en barca poderán facerse nos seguintes horarios:
- Luns a venres, entre as 18:00 e as 22:00 horas
- Sábados, domingos e festivos: tamén en horario de mañá desde as 11:00 e ata as 14:00 horas e pola tarde de 18:00 a 22:00 horas.
NORMAS DE SEGURIDADE
- A capacidade máxima das barcas será determinada polo encargado do servizo.
- Os usuarios contarán con chalecos salvavidas, se son solicitados .
- Seguirase en todo momento as instrucións do persoal encargado da actividade.
