A ‘avoa’ de Galicia, Genoveva Rodríguez Otero, faleceu aos 111 anos de idade en Monforte de Lemos. Era a muller máis lonxeva da comunidade desde que o pintor Luís Torras morreu en Vigo o pasado mes de xaneiro, á mesma idade.

Genoveva Rodríguez faleceu na pasada xornada e José Tomé, alcalde da localidade, trasladou á súa familia “as súas máis sinceras e emotivas condolencias nestes duros momentos”, en nome da Corporación Municipal e de todos os monfortinos e monfortinas.

Fíxoo nun comunicado no que se indica que a falecida era veciña do número 31 do Campo de San Antonio e viúva de Francisco González.

A condución dos seus restos mortais terá lugar este mércores 13 de novembro ás 16.45 horas desde o Tanatorio Raúl ata a igrexa parroquial de San Antonio, onde terá lugar o funeral, tras o que será incinerada na intimidade familiar.

Nacera o 1 de xaneiro de 1913, polo que no arranque do próximo ano cumpriría 112 de vida.