O Concello do Saviñao, como xa é tradicional, convocou unha concentración diante da Casa do Concello ás 12:00 h. para proceder á lectura do manifesto do Día da Muller.

No que respecta ao resto de actos de conmemoración do 8M fontes do concello anunciaron que a andaina programada para este sábado 9 de marzo queda suspendida dadas as condicións meteorolóxicas de choiva e frío. A camiñada, circular de 10 quilómetros, comunicaba Escairón co Ecomuseo de Arxeriz, onde habería unha visita guiada. Á volta, na carpa da Praza do concello habería pinchos e entrega de mochilas aos participantes.

A falta de saber a nova data desta andaina, dende o concello sinalan que aínda se pode apuntar máis xente no concello.

OUTRAS ACTIVIDADES

Ata o 15 de marzo pódese participar no concurso de debuxo baixo o lema: “Mulleres e nenas que moven o mundo”. As bases están na web do concello e nas súas redes sociais.

O 12 de marzo o alumnado do CPI Dr. López Suárez participará en obradoiros de igualdade organizados dende polo concello.

E como é tamén costume, ata o 31 de marzo a fachada da Casa do Concello permanecerá iluminada de cor violeta para visibilizar o mes da muller.