O Vendaval, Mostra de Cinema Portugués da Ribeira Sacra, regresa na súa terceira edición para converter o rural galego nun punto de encontro coa cinematografía lusa. Entre o 25 e o 30 de agosto, os concellos de Sarria, Sober, O Saviñao e Bóveda acollerán unha variada programación que inclúe proxeccións, música e formación.
A programación comezará o martes 25 ás 22:00 horas nun espazo singular coñecido como A Palleira, situado en Manán no Concello de Sarria. Trátase dun refuxio de artistas que aposta pola comunidade e a natureza a través da creatividade. A xornada centrarase na xentrificación e as dinámicas das cidades modernas a través de catro curtametraxes.
CURTAMETRAXES DA PRIMEIRA XORNADA
Bad for a moment (Daniel Soares, 2024): Unha ficción na que o equipo dun estudio de arquitectura se confronta coa realidade dun barrio social en proceso de xentrificación durante unha actividade de team building. A proxección contará coa presenza da actriz Ana Vilaça.
STOP – Salas de ensaio para um materialismo histórico (Jorge Quintela, 2025): Este documental, que contará coa presenza do seu director, ensaia sobre a transformación do mítico Centro Comercial Stop no Porto desde unha perspectiva materialista.
Maio (Claudio Carbone, 2025): A obra narra a presión institucional e a precariedade que viven os residentes do barrio 6 de Maio en Lisboa, utilizando a porta como metáfora da súa constante incerteza.
Cães que ladram aos pássaros (Leonor Teles, 2019): Sigue a Vicente mentres percorre un Porto transformado polo turismo e a xentrificación durante as súas vacacións escolares.
CURSO ‘FILMAR DEPOIS DO IMPÉRIO’ CON MARGARITA CARDOSO
A prestixiosa cineasta Margarida Cardoso impartirá por primeira vez en Galicia o curso Filmar Depois do Império. A formación terá lugar o 29 e 30 de agosto na Casa da Memoria (Xullán, Bóveda).
Cardoso, cuxa obra foi premiada en festivais como Venecia ou Locarno, abordará como o cinema portugués confrontou a herdanza colonial e a memoria das guerras en África. O curso revisitará filmes como Natal 71 ou Banzo (que terá a súa estrea galega no Vendaval o sábado 29 tras triunfar nos Premios Sophia). A inscrición inclúe almorzos, comidas e acceso a todas as actividades do festival.
Na páxina web do festival pode atoparse toda a información necesaria para as inscricións no devandito curso.
