En Sarria defenden “un servizo de pediatría digno”

Un grupo de nais e pais están a recoller sinaturas para que o Centro de Saúde da localidade dispoña todos os días da semana dun pediatra.

Centro de Saúde de Sarria. Foto: paxinasgalegas.com

Sarria está a sufrir tamén problemas co servizo de pediatría. Segundo denuncian un grupo de pais e nais afectados “en condicións normais temos dous pediatras diarios, pero agora hai unha baixa por maternidade sen cubrir e agora só hai unha que absorbe o traballo todo. Está desbordada”.

Como medida de presión están a recoller sinaturas, levan arriba das 2.000, e pensan enviar un escrito de queixa á Valedora do Pobo e a responsables do Sergas.

No escrito expoñen o problema do déficit de asistencia sanitaria dos máis pequenos e solicitan que o Centro de Saúde de Sarria dispoña dun pediatra  todos os días de luns a venres de 8:00 a 15:00 h. Segundo denuncian “a solución do Sergas é mandar especialistas doutros centros a facer controis de saúde con axenda cerrada e só atendendo aos nenos citados, pero iso non arranxa o problema. Se un neno se pon enfermo en quenda de mañá ou o ve un médico de familia (recargando o seu traballo) ou derívano ao Hula”.

O colectivo de familias lembra ademais que as deficiencias afectan a cinco concellos do sur de Lugo: Sarria, Paradela, O Incio, Samos e Triacastela.

DEIXAR UN COMENTARIO

Please enter your comment!
Please enter your name here