Nos últimos meses, a plataforma fixo enquisas entre usuarios e usuarias do centro de saúde e do PAC da localidade para avaliar tanto o estado da atención primaria como o da atención especializada que reciben no Hospital Comarcal de Monforte, o que lles corresponde como referencia.
As máis de 250 enquisas realizadas a pacientes maiores de 18 anos antes de mediados de decembro (cando á situación sanitaria se uniu ao colapso polos casos de gripe A e Covid), arroxan datos como que o tempo de espera para unha cita é superior a unha semana en máis do 80% dos casos, “Un alto tempo de espera que, segundo os datos recollidos, fixo que máis da metade dos pacientes que participaron no estudo tiveran que acudir a urxencias por non ser atendidos polo seu facultativo de cabeceira nun tempo razonable”, engaden desde a plataforma.
A enquisa incluía preguntas para avaliar a situación da atención sanitaria especializada que os veciños e veciñas de Chantada reciben no seu hospital de referencia, o de Monforte. O tempo de espera entre a petición dunha cita e a consulta cun especialista é superior a 4 meses no 70% dos casos, “o que á vez conleva que máis da metade dos pacientes rematen acundindo a unha consulta privada durante o tempo de espera para ser atendido na sanidade pública”.
As enquisas de Chantada quere sanidade tamén arroxan que a espera posterior para as probas pedidas polos especialistas é superior ós 3 meses no 80% dos casos e que máis do 30% desas probas deriváronse a clínicas privadas ou concertadas.
Con estes datos, dende a plataforma ‘Chantada quere sanidade’ reiteran a denuncia á precaria situación sanitaria que viven os e as veciñas de Chantada.
