Baixo o título: “A túa mente importa: Escola de saúde”, a Asociación Albores Saúde Mental está a programar unha serie de charlas divulgativas e formativas que teñen como obxectivo mellorar, con rutinas positivas, a saúde mental de todas aquelas persoas que queiran mellorar o seu benestar mental, mediante cambios pequenos na súa vida cotiá.
Segundo informan dende a entidade, “xurden da observación da necesidade de tomar conciencia da importancia de como os pequenos hábitos do día a día inflúen no benestar das pesoas. Moi a miudo non nos decatamos da medida en que as actividades que realizamos por rutina, nos afectan, e os malos hábitos contribúen a sobrecargarnos, estresarnos e desestabilizarnos”.
CHARLAS PROGRAMADAS
1-Coidar a nosa saúde é coidar a saúde mental (pendente de data).
2-Uso axeitado dos medicamentos (20/03/2024).
3-Seguridade no fogar (26/04/2024).
4-Diabetes e alimentación (27/05/2024, data pendente de confirmar).
5-Taller de musicoterapia (sen data polo momento).
6- Benestar psicolóxico e emocional na incorporación ao mercado laboral (pendente de fixar data).
7-Exercicio físico e lecer (sen data polo momento).
Todas as charlas serán no Salón de Actos do Hospital Comarcal de Monforte ás 16:00 h.
Dende Albores sinalan tamén que segundo vaian tendo as datas pendentes do calendario irán trasladando a información. Para asistir, quen estea interesado/a pode inscribirse nalgunha ou en todas as charlas no 982 404.968.
AGRADECEMENTOS Á CIDADANÍA POR MARCAR ‘FINS SOCIAIS’ NA DECLARACIÓN
Dende Albores trasladan tamén nun comunicado de prensa que queren agradecer o xesto da cidadanía que marcou a casiña de “fins sociais” na declaración do IRPF. Grazas a ela, a Xunta de Galicia, a través da Consellería de Política Social, subvencionará parte dos seus programas durante este 2024, concretamente os seguintes:
Programa “Contigo”: de promoción da autonomía e prevención de dependencia en persoas con enfermidade mental, a través da axuda a domicilio e asistencia na contorna.
Programa “Apoio”: apoio no exercicio da capacidade xurídica, naqueles casos decretados xudicialmente. Ademais desta prestación, o programa tamén inclúe información, orientación e asesoramento a potenciais persoas usuarias, familias e persoas interesadas, sobre os procedementos de provisión de apoios que sustitúen ás antigas tutelas e curatelas.
Programa “Facendo Familia”: de orientación, mediación e intervención familiar, para mellorar o funcionamento da unidade de convivencia, previr procesos de desintegración familiar e a soedade non desexada das persoas con problemas de saúde mental.
Programa “O teu tempo”: de respiro, apoio e descanso ás persoas coidadoras de persoas con problemas de saúde mental, coa fin de mellorar o seu benestar.
Os programas están desenvolvidos por distintas profesionais entre as/os que se atopan Psicólogas, Traballadora Social, Terapeuta Ocupacional, Educadora Social, Asesora Xurídica e Auxiliares de Enfermería e levaranse a cabo desde os locais que Albores Saúde Mental ten en Monforte e en Chantada.
