A plataforma veciñal Chantada quere Sanidade convoca a concentración do venres, 19 de decembro, ás 12:30h, diante do Centro de Saúde de Chantada “ante a situación límite no Centro de Saúde de Chantada que están sufrindo profesionais e usuarios”. Aseguran que será a primeira medida doutras, para denunciar a falta de médicos e reclamar unha atención digna ás persoas usuarias.

A plataforma denuncia que, “as ausencias dos profesionais médicos debido a baixas ou vacacións cúbrense de xeito alterno con persoal alleo ao centro, sen continuidade asistencial e sen asumir tarefas esenciais o que provoca que moitos doentes non consigan cita ou non teñan quen os atenda”, e lembran a sobrecarga que teñen os profesionais que traballan diariamente.

“Hai doentes que xa dende finais de novembro non poden obter cita con algún dos médicos que prestan servizo neste centro de saúde. Estamos a falar de máis dun mes de espera para unha cita de atención primaria”, insisten.

Esta plataforma veciñal denuncia que “anos de falta de previsión e unha xestión deficiente por parte das administracións deixan, unha vez máis, á veciñanza desasistida. A situación reflíctese no día a día do centro, onde se vive un ambiente de incerteza permanente”. Engaden a saturación que isto provoca no o servizo de Urxencias do Hospital Comarcal de Monforte.

Centro saúde Chantada / Chantada quere Sanidade